Գարիկն է, սահմանապահ Բերդավան գյուղից: Թումո Կողբի բացվելուն սպասել է շուրջ 5 տարի: Չնայած հագեցած առօրյային` հողագործությունից մինչև դպրոցի աշխորհրդի նախագահի պարտականություններ, նա հասցնում է ժամանակ տրամադրել իր սիրած զբաղմունքներին` նկարչությանը և ծրագրավորմանը:
Հաճախելով Կողբի գեղարվեստի դպրոց` Գարիկը համատեղում է քանդակագործությունն ու նկարչությունը, միաժամանակ երազում է ծրագրավող դառնալ:
«Նկարչությունն իմ տարերքն է, իսկ ծրագրավորումը հավանաբար հիմնական մասնագիտությունը: Թումոյում համոզվեցի, որ հենց ծրագրավորումն եմ ընտրելու»,- ասում է Գարիկը: Նաև ավելացնում, որ ուսումն ավարտելուց հետո վերադառնալու է ծննդավայր, քանի որ ցանկանում է իր ներդրումն ունենալ համայնքի զարգացման մեջ:
Բացի այն, որ Գարիկը գյուղի արվեստասեր ընկերների հետ հիմնել է «Դեռահաս արվեստասերների կենտրոն», որտեղ կքննարկեն տեղի խնդիրները ու կառաջարկեն լուծումներ, նրա կյանքի անբաժանելի մասն է կազմում հողագործությունը. աճեցնում է բանջարեղեն` լոբի, լոլիկ և սիրով խնամում տան այգին` մշակելով ձիթապտղի, արքայանարնջի, թթի, փշատի և տարածաշրջանին բնորոշ այլ ծառեր:
«Հողի հետ գործ անելիս հանգստանում եմ, մտքերս հավաքում: Հետաքրքիր է հետևել, թե ինչպես է հողից ծնվում կյանքը»,- նշում է Գարիկը:
Իսկ Թումո՜ն:
Գարիկի կարծիքով Թումոն զարգացման այնքան հնարավորություններ է տալիս համայնքի պատանիներին, որ արդեն զգում են նրա դրական ազդեցությունը:
«Իմ ընկերներից շատերը Թումոյի շնորհիվ արդեն կողմնորոշվել են մասնագիտության հարցում: Ազատ միջավայրը, որտեղ դու հնարավորություն ունես ընտրելու, քեզ կարևոր զգալու, շատ անհրաժեշտ էր մեզ»,- ասում է Գարիկը:
Արդեն հաջողությամբ մասնակցել է կայքերի մշակման և լուսանկարչության դասընթացներին, ինչպես նաև Թումոգրաֆի մրցույթին` ներկայացնելով սահմանին ապրելու, հույսի և խորհրդանշական Ղալինջաքար ամրոցի մասին պատմող լուսանկար:
Ղալինջաքար ամրոց, Տավուշի մարզ | Թումոգրաֆի մրցույթ
Գարիկը երազում է, որ մի օր Թումո Կողբի աշխատանքային եռուզեռի մասը կդառնա` մարզիչից մինչև դասընթացավար:
«Մի գաղտնիք բացեմ, նույնիսկ դիմել եմ Թումոյի մարզիչ դառնալու համար, շատ եմ ուզում էս միջավայրում աշխատել»,- խոստովանում է Գարիկը՝ շարունակելով հաստատուն քայլերով ճանապարհ հարթել դեպի իր երազանքները:
