Թումոյում անցկացվում են դասընթացներ բոլոր 14 կրթական ոլորտներում։ Դասընթացների արդյունքում ուսանողներն ստեղծում են անհատական կամ խմբային նախագծեր, որոնք տեղադրվում են նրանց թվային պորֆոլիոներում, հրապարակվում Թումոյի առցանց հարթակներում, իսկ երբեմն էլ ուղարկվում են մրցույթների և փառատոնների։ Դասընթացին մասնակցելով` պատանիները ձեռք են բերում գործնական գիտելիքներ տեխնոլոգիաների և դիզայնի նորարարական ոլորտներում և զարգացնում են թիմային աշխատանքի ու հաղորդակցության իրենց հմտությունները։

Աշխատարանները եզակի գործնական դասընթացներ են, որոնք վարում են ոլորտի լավագույն միջազգային մասնագետները: Ամեն տարի 100-ից ավելի մասնագետներ Nasa, Google, Disney և այլ հայտնի կազմակերպություններից գալիս են Թումո՝ կամավոր սկզբունքով աշխատելու թումոցիների հետ իրական նախագծերի վրա և կիսվելու իրենց անգնահատելի փորձով:
Եթե ցանկանում եք վարել աշխատարան և կիսվել ձեր փորձով Թումոյի ուսանողների հետ, անցե՛ք այս հղումով:

Թումո շավիղը նորարարական հարթակ է, որը ձևավորում և ներկայացնում է յուրաքանչյուր ուսանողի անհատական կրթական ուղին՝ բոլոր վարժանքները, դասընթացներն ու աշխատարանները ժամանակագրական հերթականությամբ: Այն մշտապես թարմացվում ու հարմարեցվում է արհեստական բանականության միջոցով՝ հաշվի առնելով ուսանողի ուսումնառության արագությունն ու հետաքրքրությունները: Թումո շավիղը յուրահատուկ կրթական գործիք է, որն օգնում է կառուցել ամեն պատանու հաջողության ճանապարհը՝ տալով նրան ընտրության լիակատար ազատություն։