Վահէ և Լյուսի մրցանակը տրվում է Թումոյի ուսանողներին ու շրջանավարտներին, որոնք ներկայացնել են իրենց աշխատանքներն արվեստի, տեխնոլոգիաների, երաժշտության և ֆիլմի ոլորտներում։ Հայաստանի և Արցախի տարբեր քաղաքներից ուղարկված 398 դիմումներ դիտարկվել են՝ հիմնվելով դրանց ստեղծարարության, ներդրված ջանքերի և տեխնիկական մակարդակի վրա։ Թումոյի ուսանողներից, դասընթացավարներից և համապատասխան ոլորտի առաջատար մասնագետներից բաղկացած ժյուրիի չորս խմբերը ընտրել են յուրաքանչյուր կատեգորիայի 1-ին, 2-րդ և 3-րդ տեղերը։

1-ին տեղ – 1,000,000 ՀՀ դրամ
2-րդ տեղ – 700,000 ՀՀ դրամ
3-րդ տեղ – 300,000 ՀՀ դրամ

«Վահէ և Լյուսի» մրցանակաբաշխությունը հիմնադրվել է Վահէ և Լյուսի Ֆատտալների կողմից։

Վահէ և Լյուսի 2023 հաղթողներ

ԱՐՎԵՍՏ

1-ին տեղ

«Հայ հին վիպաշխարհը», Թումո Երևան

Անահիտ Սարգսյան, 21

Թումո Երևանի ուսանող Անահիտ Սարգսյանը նկարազարդել է հայկական դիցաբանության աստվածներին` ոգեշնչվելով Սարգիս Հարությունյանի «Հայ հին վիպաշխարհ» գրքի «Աստվածներ և հերոսներ» գլխից: Նկարազարդումներն անելու և վերջնական արդյունքը ստանալու համար պահանջվել է 3 ամիս:

2-րդ տեղ

«Կյանքի Լաբիրինթոսը», Թումո Գյումրի

Էդգար Սավդալյան, 17

Թումո Գյումրիի ուսանող Էդգար Սավդալյանի ֆոտոշարքը պատմում է կիսաքանդ շենքում ապրող մարդկանց ու նրանց առօրյայի մասին և ի ցույց է դնում, թե ինչպես են նրանք հաղթահարում առօրյա դժվարությունները:

3-րդ տեղ

«Դուռ, որից ներս` լիքը հուշեր», Թումո Ստեփանակերտ

Էլեն Դանիելյան, 15

Թումո Ստեփանակերտի ուսանող Էլեն Դանիելյանը քաղաքի դռներից մեկը ներկայացրել է իմպրեսիոնիստական ոճով` փորձելով գույների միջոցով փոխանցել դռան ետևում եղած անցած ու գնացած հիշողությունները:

ՖԻԼՄ

1-ին տեղ

«Թեղուտից Նեյմարը», Թումո Դիլիջան

Սևանի, Դիլիջանի, Ճամբարակի և Գավառի ուսանողներն ուղևորվեցին Թեղուտ, որտեղ վավերագրեցին տեղի ֆուտբոլի երիտասարդական թիմի խաղացողների մանկական երազանքները: Նրանց մոտիվացիան է Թեղուտ գյուղի ֆուտբոլի երիտասարդական թիմի մարզիչ Յաո Սիլվեն Կուասսին, որը եկել է Կոտ դ’Իվուարից:

2-րդ տեղ

«Մայրամուտ», Թումո Երևան

Քրիստինե Խանամիրյան, 20

Այս անիմացիայի միջոցով Քրիստինե Խանամիրյանը ցույց է տվել, թե ինչպես կավարտվեր ինքնամփոփ երիտասարդի կյանքը, եթե նա չորոշեր հանդիպել իր ընկերների հետ և միայնակ փակված մնար իր սենյակում:

3-րդ տեղ

«Անտանիք», Թումո Գյումրի և Թումո Երևան

Ֆրունզե Ավետիսյան, 21
Աստղիկ Հովհաննեսով, 20

Ֆրունզե Ավետիսյանն ու Աստղիկ Հովհաննեսովը տեսախցիկի միջոցով պատմել են անօթևանների կյանքի և առօրեական խոչընդոտների մասին: Չնայած դժվարություններին, ֆիլմի «դերակատարներ» Սամվելն ու Արուսյակը երգում են և երազում վաղվա մասին:

Ուշադրություն.
Թումոն չի խրախուսում ծխելը: Եկե՛ք կարևորենք առողջ և անծուխ միջավայրը:

ԵՐԱԺՇՏՈՒԹՅՈՒՆ

1-ին տեղ

«Կառալյոկ», Թումո Երևան

Լևոն Երկանյան, 17
Կարինե Ավետիսյան, 19

Թումո Երևանի ուսանողներ Լևոն Երկանյանն ու Կարինե Ավետիսյանը Ableton ծրագրի միջոցով ստեղծել են այս գործը` էլեկտրոնային երաժշտություններ ու կոմպոզիցիոն պատկերներ ուսումնասիրելուց հետո:

2-րդ տեղ

«Ալիքներ», Թումո Երևան

Սեդա Պլուզյան, 18

Թումո Երևանի ուսանող Սեդա Պլուզյանը միավորելով բառերն ու էլեկտրոնային երաժշտության տարրերը ստեղծել է երգ օվկիանոսի մասին` փոխանցելով դրա ալիքների ուժգնությունը:

3-րդ տեղ

«Հայացք», Թումո Երևան

Մաքսիմ Գինո, 18
Համայակ Բեթսարկեզ Ղարաղեզ, 24

Միավորելով դաշնամուրային ակորդները և բիթբոքսը, Մաքսիմ Գինոն և Համայակ Բեթսարկեզ Ղարաղեզը ստեղծել են այս գործը, որը պահի ոգեշնչման և երաժշտական տաղանդի արդյունք է:

ՏԵԽՆՈԼՈԳԻԱՆԵՐ

1-ին տեղ

Վիդեոխաղ «Bubbly Blast», Թումո Գյումրի

Սուսաննա Ավդալյան, 16
Վարդգես Աթոյան, 16

Սուսաննա Ավդալյանի և Վարդգես Աթոյանի ստեղծած 3D խաղը տեղակայված է սթիմփանք տարրերով միջնադարյան գյուղում, որտեղ գլխավոր հերոս Ֆիննը որոնում է իր առևանգնված քրոջը և ցանկանում է գյուղը փրկել գազավորված ըմպելիք հիշեցնող հրեշներից:

2-րդ տեղ

Բջջային հավելված «Get Product», Թումո Գյումրի

Էդգար Բեժանյան, 17

Էդգար Բեժանյանը ստեղծել է բջջային հավելված, որը հնարավորություն է տալիս ծանոթանալ ցանկացած պրոդուկտի նկարագրությանը, արժեքին և նույնիսկ սպառողների կարծիքներին:

3-րդ տեղ

Հավելված «Maily», Թումո Երևան

Անի Գուլոյան, 22

Անի Գուլոյանն արհեստական բանականության միջոցով ստեղծել է Google Chrome-ի հավելված, որը ճանաչում է օգտատերերի կողմից ստեղծված տեքստի զգացմունքները:

Ժյուրիի անդամներ

Վահէ և Լյուսի մրցանակը նվիրված է Վահէ Ֆատտալի և նրա կնոջ` Լյուսիի հիշատակին: Իր կյանքի վերջին տարիներին Վահէն հիմնեց այս մրցանակը` ի հիշատակ իր կնոջ: Այժմ մենք այն նվիրում ենք նրանց հիշատակին և թումոցիների անունից շնորհակալություն ենք հայտնում այս կարևոր աջակցության համար:

Նկարիչ և գրաֆիկական դիզայներ Վահէ Ֆատտալը ուսումնասիրել է գեղանկարչություն Փարիզի գեղարվեստի ազգային դպրոցում: Լոս Անջելեսի մի շարք մեծ կազմակերպություններում որպես արտ-տնօրեն աշխատելուց հետո, հիմնել է դիզայնի և գովազդի սեփական գրասենյակը:

Գրասենյակի գործընկերների շարքը ներառում է այնպիսի կազմակերպություններ, ինչպիսիք են ABC հեռուստաընկերությունը (ABC-ի բացառիկ գովազդային գործընկերն է եղել 18 տարի), Հոլիվուդյան կինոարտադրության «մեծ հնգյակը» (Paramount Studios, Columbia Pictures/Sony Pictures Studio, 20th Century Fox, Universal Studios, Warner Bros Studio), Nissan-ը, UCLA Extension-ը և այլք:

Գրասենյակն իրականացնում է կորպորատիվ ինքնության և հաղորդակցության, գովազդային և մարկետինգային արշավների, ֆիլմերի և հեռուստատեսական արշավների, շարժական գրաֆիկայի և բրենդավորման բոլոր ծառայությունները:

Միևնույն ժամանակ Վահէն ստեղծագործականորեն ներգրավված էր Հայաստանի գործընթացների և նախագծերի առաջխաղացման ծրագրերում. նախագծել է Արցախի խորհրդանիշն ու պաստառները (1988), արցախյան դրոշի դիզայնը (1988), «Ոսկե ծիրան» միջազգային կինոփառատոնի վիզուալ տարբերանշանի դիզայնը (2004)։ Ֆատտալը հանդիսացել է Հայաստան համահայկական հիմնադրամի գլխավոր համահիմնադիրներից մեկը և «make it happen» արշավի դիզայնի հեղինակն է (2004), եղել է Armenian International Magazine-ի արտ-տնօրեն (1990-1992):

Լյուսին եղել է Կալիֆոռնիայի համալսարանի շրջանավարտ, ունեցել է փիլիսոփայության և ֆրանսիական գրականության մագիստրոսական աստիճան: Այնուհետև Փարիզի Սորբոնի համալսարանում ավարտել է ֆրանսերենի և քաղաքակրթական գիտությունների դասընթացներ:

Վահէն և Լյուսին հանդիպել, ամուսնացել և ապրել են Փարիզում:

Հետագայում նրանք տեղափոխվել են Լոս Անջելես, որտեղ Լյուսին որոշ տարիներ ֆրանսերեն դասավանդելուց հետո հիմնել է իր տուրիստական գործակալությունը Բևերլի Հիլզում, որը տրամադրում էր միջազգային VIP ուղևորություններ և բնակության ծառայություններ արվեստի (ցուցասրահներին, արտիստներին, աճուրդի տներին, արվեստի խորհրդատուներին), ժամանցի ոլորտի (կինոարտադրողների, դերասանների, ռեժիսորների, պրոդյուսերների) ներկայացուցիչների, ինչպես նաև կորպորատիվ կազմակերպությունների:

Վահէն ու Լյուսին կիսում էին նվիրվածությունն ու սերը Հայաստանի, կրթության, արվեստի և աշխարհի բացահայտման հանդեպ: