Ողջո՛ւյն,
Այսօր կիսվում ենք լուրով, որին արդեն երկար ժամանակ սպասում են Լոռու մարզի պատանիներն ու նրանց ընտանիքները. Թումո Վանաձորն ամբողջովին ֆինանսավորված է։
Երկար տարիների սպասումից և համայնքի մեծ ակնկալիքներից հետո կարող ենք վստահորեն ասել, որ Թումո Վանաձորը կբացվի 2028 թվականին։
Ֆինանսավորումը հնարավոր դարձավ ահռելի միասնական ջանքերի շնորհիվ։ Մի բարերար ընտանիք կատարեց 5 միլիոն դոլարի նվիրատվություն, որը վճռական էր ֆինանսավորումն ամբողջացնելու հարցում։ Ընտանիքը որոշեց մնալ անանուն, որպեսզի ուշադրությունը հրավիրի Հայաստանի պատանիների ու նրանց ծառայող՝ Թումոյի առաքելությանը։ Այս նախագիծն իրականություն դարձավ բարերարների առաջնորդության շնորհիվ, և մենք խորապես երախտապարտ ենք նրանց մեր առաքելության հանդեպ ցուցաբերած վստահության համար։
Ցանկանում ենք նաև շնորհակալություն հայտնել Թորոս Մանգասարյանին, Ջուդիթ Սարյանին և Վիկտոր Զարուգյանին, Քլարա Մարկոսյանին և Մարկոսյան ընտանիքին իրենց անսահման առատաձեռնության համար, ինչպես նաև բազմաթիվ այլոց, որոնց զգալի նախնական ներդրումները մեկնարկ տվեցին այս նախաձեռնությանը՝ դառնալով հետագա նվիրատուներին համախմբող շարժիչ ուժը։
Եվս մի լավ լուր․ Հայաստանի կառավարությունը Թումոյին է նվիրաբերել Վանաձորում գտնվող գեղեցիկ պատմական շենք, որը կդառնա Թումոյի ապագա տունը։ Երկար ժամանակ լքված շենքը կվերականգնվի և կվերաիմաստավորվի որպես կրթական միջավայր, որտեղ մարզի պատանիները կկարողանան սովորել, ստեղծել և կառուցել։
Ինչ է սա նշանակում Լոռու մարզկենտրոն Վանաձորի համար
Հարակից համայնքների 5,500 պատանիներ արդեն կարող են հաճախել Թումո տուփեր կատարելու ինքնուսուցման վարժանքներն առանց հեռանալու իրենց բնակավայրերից։ Իսկ գործնական դասընթացների և աշխատարանների համար նրանք այցելում են մոտակա Թումո կենտրոններ, որտեղ սովորում և ոգեշնչվում են ոլորտի լավագույն մասնագետներից հատուկ կահավորված տարածքներում՝ երաժշտական և ձայնագրման ստուդիաներ, ռոբոտաշինության սենյակներ և կինոսրահ։
Թումո Վանաձորն այս ամենը կբերի Լոռի առաջին անգամ։
Լոռու պատանիների համար սա շրջադարձային կլինի։ Իսկ Հայաստանի համար սա ևս մի մեծ քայլ է դեպի մեր նպատակը՝ երկրի յուրաքանչյուր պատանու համար հասանելի դարձնել կյանքեր փոխող կրթական հնարավորությունները։
Շնորհակալ ենք այս ճանապարհին մեզ ուղեկցելու համար։