Ինչու՞ հենց ռոբոտաշինություն։ Նախ մենք դեռ վայելում ենք Վաշինգտոնում անցկացված համաշխարհային առաջին ռոբոտաշինության մրցույթին Թումոյի այս տարվա բրոնզե մեդալի հաջողության տրամադրությունը։ Իսկ թե ինչի միջով են անցնում ուսանողները ընդունակ ռոբոտներ կառուցելու համար, և որն է տարբերությունը ռոբոտի և, ասենք, սուրճի սարքի միջև կանդրադառնանք այստեղ։ Բայց նախ՝ եկեք քննարկենք բոլոր այն հմտությունները, որոնք զարգանցնում են թումոցիները այս դասընթացների ժամանակ։

robotics - Թումոյի ռոբոտների կյանքից

Գուցե հակատրամաբանական թվա, բայց նոր տեխնոլոգիաները չեն առաջնայինը Թումոյի ռոբոտաշինության դասընթացում։ Տեխնոլոգիաների անընդհատ զարգացող արագությունը ամենաթարմ ու ամենամեծ նորություններն արագ թողնում է անցյալում, բայց թումոցիները մնայուն արժեքների վրա են աշխատում։ Այսպիսով՝ ինչ են սովորում թումոցիները ռոբոտաշինության դասընթացին։ Դասընթացավար Սուսաննա Գալստյանը ասում է, որ իր ուսանողների ձեռքբերումները ժամանակավորի կնիքը չունեն, որովհետև կյանքի հմտություններ են և կարևոր են անկախ ժամանակից, ինչպես ստեղծագործ ու վերլուծողական մտածելակերպն է, խնդիրների լուծումները, խմբային աշխատանքը և հանգստի գոտուց դուրս աշխատելը։ Նրա կոլեգա Մանվել Վատոյանը համաձայնում է, որ ռոբոտաշինությունը պատանիներին հիմնարար մասնագիտական գիտելիքներ է տալիս տարբեր ոլորտներում։

robitix - Թումոյի ռոբոտների կյանքից

Մակարդակ I

Ուսանողներն այս մակարդակում Lego ռոբոտներ են կառուցում հիմնական հավաքածուից՝ աշխատելով խմբով։ Ու, թեև բոլոր հավաքածուները նույնն են, յուրաքանչյուր ուսանող իր սեփական ու ինքնատիպ ճանապարհն է անցնում այն կառուցելիս։ Ռոբոտների կառուցման խնդիրների լուծման աշխատանքի ամենակարևոր մասն այն է, որ նրանք մանրամասն ուղղորդության կարիք չեն ունենում, և ինքնուրույն աշխատանքը յուրացնելու ամենաարդյունավետ ճանապարհն է։ Ուսանողները փնտրում են խնդիրների լուծումները կախված նրանից, թե որ ուղղությամբ պետք է շարժվի ռոբոտը՝ վեր, թե առաջ։ Իհարկե, ուսանողները սովորում են ծրագրավորման հիմնական հմտությունները, աշխատում սենսորների ու շարժիչների հետ, ծանոթանում արհեստական բանականության հետ, որպեսզի կառուցեն ինքնուրույն շարժվող ու որոշումներ կայացնող ռոբոտ, քանի որ այն պարզապես սարք չէ․ այն հատուկ ծրագրավորված սարք է, որը ինքնուրույն շարժվում ու որոշումներ է ընդունում՝ կախված տրված փոփոխականներից։ Դե սրանից ձեր սուրճի ապարատը դժվար թե գլուխ հանի։

Մակարդակ II

Այս փուլում արդեն ստեղծագործական աշխատանքի ժամանակն է։ Խմբերը ձևավորվում են ըստ իրենց ռոբոտաշինության գաղափարների, և ուսանողներն իրենց ռոբոտներին նախագծում, կառուցում և ծրագրավորում են Lego NXT հավաքածուներից։ Այս մակարդակում չկան անիրագործելի, չափազանց մեծ կամ փոքր գաղափարներ։ Եթե անգամ ռոբոտի կառուցման համար ինչ-որ դետալ պակասում է, հոգ չէ, ուսանողները կարող են այն մոդելավորել ու տպել 3D տպագրական սարքով։ Ռոբոտաշինությունն ընդգրկում է ոչ միայն գիտությունները, տեխնոլոգիաները, ինժեներական աշխատանքն ու մաթեմատիկան, այլ նաև արվեստ ու դիզայնը։ Այսպես ուսանողները հնարավորություն են ունենում Թումոյում զարգացնել բազմազան հմտություններ ու աշխատել իրենց ուժեղ կողմերի վրա։ Երկրորդ մակարդակի ավարտին, կիրառելով ինժեներական տարբեր լուծումներ ու ծրագրավորման մոտեցումներ, պատանիները կառուցում, փորձարկում ու ներկայացնում են LEGO ռոբոտների իրենց մոդելները։

Մակարդակ III

Մինչ այս մակարդակը, ուսանողներն արդեն գիտեն կառուցել հրահանգներին հետևող ու որոշումներ կայացնող ռոբոտներ: Իսկ հիմա պատկերացրեք ռոբոտների, որոնք կարողանում են հաղորդակցվել մյուս ռոբոտների հետ և համագործակցել միմյանց հետ։ Սա, իհարկե, կարող է ֆանտաստիկայի ժանրից թվալ, բայց այս ընդունակ ռոբոտը ուսումնական ծրագրի վերջնական փուլի արդյունքն է։ Դասընթացի ավարտին ուսանողները կներկայացնեն իրար հետ wifi-ի միջոցով հաղորդակցվող ու հանձնարարությունները կատարող ռոբոտները, որոնք նախագծվում են համակարգչով կամ այլ սարքով։ Ուսանողները յուրացնում են Raspberry Pi միահենք համակարգչի և Arduino բաց աղբյուրի ծրագրային և ապարատային ապահովման հետ աշխատանքը։ Նրանց ռոբոտները ավելի ինտելեկտուալ են քան երբևէ։

Ռոբոտաշինության դասընթացները զարգացնում են ուսանողի վերլուծական մտածողությունը։ Այն, միավորելով գիտության, տեխնիկայի, ինժեներական ու մաթեմատիկական ոլորտները արվեստի ու դիզայնի հետ, համախմբում է պատանիներին, և նրանք հնարավորություն են ունենում լրացնել իրենց գիտելիքները՝ սովորելով իրարից։ «Ամենահետաքրքիր մասը աշխատանքի այն է, որ ուսանողները կարողանում են ստեղծել մեկ գաղափար, այնուհետև տեսնել այն իրական աշխարհում՝ շարժվելիս ու աշխատելիս», ասում է դասընթացավար Հայկ Ոսկանյանը։ Իրենց հարմար ու հանգիստ վիճակից դուրս գալով, աշխատելով տարբեր մարդկանց հետ, անընդհատ «ոտքի վրա» մտածելով ու խնդիրներ լուծելով և անգամ կառույցին պակասող դետալների նախագծելով՝ ուսանողները ձեռք են բերում տեխնոլոգիաների դաշտում հեշտ կողմնորոշվելու արժեքավոր հմտությունը։ Սա նրանց նաև ինքնավստահություն ու յուրօրինակ կենսափորձ է տալիս, որը անհնար է ստանալ մեկ այլ պայմաններում։ Եվ, վերջապես, ռոբոտների մասին պատմությունները կարող են պապիկի հետ հետաքրքիր զրույցների առիթ լինել։

Robotics icon - Թումոյի ռոբոտների կյանքից
Like
Like Love Haha Wow Sad Angry
55