Այն ամենը, ինչ կարելի է սովորել ու ստեղծել Թումոյում, գտնվում է տեխնոլոգիաներից մինչև արվեստ ընկած ողջ սպեկտրում (իսկ երբեմն նույնիսկ դրանից դուրս)։ Այնուամենայնիվ, Թումոյի բոլոր հմտությունները միավորում է մի կարևոր գործոն՝ թվային աշխարհը։ Ու, իհարկե, տարատեսակ ու ստեղծագործական թվային արտադրանքը հենց այնպես չի դառնում հասանելի հազարավոր մարդկանց։ Դրա մասին պետք է պատմել։ Այստեղ մեր բոլոր կրթական ոլորտներին ու հմտություններին օգնության է գալիս դրանցից ամենաերիտասարդը՝ նոր մեդիան։ Դրա անունն ինքնին խոսուն է, բայց պարզաբանենք․ նոր մեդիան թվային կրիչների միջոցով տարածման վրա հիմնված մեդիայի ձև է։ Այն հաճախ հակադրվում է «հին մեդիա»-յի հետ, ինչպես հեռուստատեսությունն է, ռադիոն և մամուլը։ Այս բնորոշումը վերցված է Վիքիպեդիայից, որը, ի դեպ, նոր մեդիայի ընտիր օրինակ է։

newmedia 1 - Նոր մեդիայի տիրույթը գրավելով

Նոր մեդիա դասընթացին թումոցիները սովորում են ստեղծել հարուստ ու գրավիչ բովանդակությամբ թվային պատմություններ։ Սրա համար միայն գրելը կամ միայն լուսանկարելը բավարար չէ։ Դու պիտի կարողանաս օգտագործել տարբեր գործիքներ՝ լուսանկարներ, տեսանյութեր, ինֆոգրաֆիկա, GIF-եր, տեքստեր․․․ Ուրեմն, պիտի կարողանաս պատմություններ գրել, խմբագրել, հարցազրույց վարել, լուսանկարել, ու այս ամենի հետ մեկտեղ՝ հմտանալ բովանդակության կառավարման և ինտերակտիվ լրատվամիջոցների տեխնոլոգիաների ոլորտում: Նոր մեդիա դասընթացի արդյունքում ստեղծված պատմությունները հիմնված են ուսանողների ստեղծագործ մտքի ու չոր փաստերի վրա (էլ ի՞նչ նյութ առանց փաստերի)։ Հիմա՝ հերթով։

newmedia - Նոր մեդիայի տիրույթը գրավելով

Մակարդակ I

Առաջին մակարդակի ընթացքում պատանիները սովորում են գրել թվային պատմություն ցանկացած անհատի մասին, ով իրենց ոգեշնչում է։ Նրանք ծանոթանում են հարցազրույց վարելու, խմբագրելու, սրբագրելու հիմունքներին, սովորում են ուսումնասիրել նյութի հերոսին։ Դասընթացավար Սիրանուշ Եղիազարյանը նկատել է, որ այս ամենում պատանիների համար ամենահետաքրքիրը նոր մարդկանց՝ յուրահատուկ կերպարների հետ շփվելն է։

Առաջին մակարդակի ընթացքում ստեղծված աշխատանքներից՝ Թումո Դիլիջանի ուսանողներ Լուսինե Հովհաննիսյանի, ​Էսմա Հովհաննիսյանի​ ու Անուշ Մատինյանի կողմից։​​

Մակարդակ II

Այստեղ պատանիների հետազոտության առարկան լայնանում է։ Նրանք ընտրում են թեմա, որը ոչ միայն իրենց պիտի հետաքրքրի, այլև իրենց ընթերցողին։ Ընտրությունը լայն է՝ սկսած փողոցային երաժիշտներից մինչև կամ արդյունաբերությունը։ Միաժամանակ պատանիները ուսումնասիրում են առցանց լրատվամիջոցները, սովորում են տարբերակել ճշգրիտ աղբյուրներն ու փաստերը:

(Կարդացե՛ք երկրորդ մակարդակում ստեղծված պատմություններից մեկին այստեղ: Հեղինակ՝ Անահիտ Հովելյան)։

Մակարդակ III

Նոր մեդիայի ամենախիտ՝ երրորդ մակարդակը պատանիներին նոր մարտահրավեր է նետում։ Այստեղ նրանք պիտի աշխատեն թիմերով, կամ, ինչպես ասում է դասընթացավար Ելենա Գևորգյանը՝ «խմբագրություններով» ։ Յուրաքանչյուր ուսանող ունենում է իր դերը խմբագրությունում, իսկ դերերը շատ են՝ խմբագիր, լուսանկարիչ, օպերատոր, լրագրող, ռեժիսոր։ Այո, բազմամեդիա նյութ կառուցելու համար հարկավոր են նրանք բոլորը։

(Կարդացե՛ք թումոցի Էլեն Մինասյանի պատմությունը հայկական ֆուտբոլի մասին՝ Արարատ 73-ից մինչև Հենրիխ Մխիթարյանի մասին այստեղ)։

Զարմանալիորեն նոր մեդիա հմտությունը պատանիները հաճախ շփոթում են կայքերի ստեղծման հետ։ Բայց դասընթացավար Շողիկ Վարդանյանը բաց չի թողնում ևս մեկ անգամ պարզաբանելու հնարավորությունը՝ «Նոր մեդիայով զբաղվող պատանիները ստեղծու՛մ են կայքեր, բայց չեն ծրագրավորում դրանք։ Չէ՞ որ առանց բովանդակության կայքէջերը լրիվ անիմաստ կլինեն»:

«Եթե դրա մասին չի ասվել, դա տեղի չի ունեցել»։ Այս հայտնի խոսքը միայն փաստում է «պատմություններ պատմողների» ուժը։ Ներկայիս տեղեկատվական ահռելի հոսքում մրցունակ լինելու համար գրագետ, գրավիչ ու լսելի մուլտիմեդիա պատմություններ ստեղծելը ոչ թե ցանկալի, այլ պարտադիր հմտություն է, առանց որի մեր թումոցիների (այսինքն՝ ստեղծարար աշխարհի ապագա առաջնորդնեը) կյանքը հնարավոր չէ պատկերացնել։

New Media icon - Նոր մեդիայի տիրույթը գրավելով
Like
Like Love Haha Wow Sad Angry