Երաժշտություն սիրելու և այն ստեղծելու միջև գտնվող միջակայքը, ինչպես ցանկացած թվացյալ ահռելի անդունդ, ևս մի գործնական առաջադրանք է, որ բազմաթիվ թումոցիներ սեփական ընտրությամբ դնում են իրենց առջև։

music 2 - Յոթ նոտա, տասներկու հնչյուն, երեք մակարդակ ու անսահմանափակ հնարավորություններ

Երաժշտությունը ուսումնասիրելու, դրա ժանրերը հետազոտելու, զանազան դասական և էլեկտրոնային գործիքների, երգաստեղծման սկզբունքներին, ձայնային ձևավորմանը ծանոթանալու հետաքրքիր ու դինամիկ ընթացքը Թումոյում կոչվում է «երաժշտության դասընթացի երեք մակարդակ»։ Դասընթացավար, Pyramidz էլեկտրոնային խմբի ղեկավար Շահեն Խանդկարյանը պատմում է՝ «Շատերը հետաքրքրվում են երաժշտությամբ, բայց վախենում են դրանով զբաղվել, որովհետև երաժշտական դպրոց չեն գնացել։ Մեզ մոտ ամեն ուսանող՝ անկախ նրանից` յոթ նոտաները գիտի թե ոչ, կարող է ծանոթանալ երաժշտության բազմաշերտ աշխարհին և ստեղծագործել այդ տիրույթում»։ Դասընթացի կարևոր մաս է նաև հենց նորագույն տեխնոլոգիաների միջոցով երաժշտությամբ զբաղվելը՝ «Ինչպե՞ս է երաժշտությունը օգտագործվում 21-րդ դարի զանազան ոլորտներում։ Այս կարևոր հարցի պատասխանն իր բոլոր մանրամասներով ուսանողները ոչ միայն իմանում, այլև փորձարկում են երաժշտության դասընթացին», բացատրում է դասընթացվար Ծովինար Արծրունին։ Իսկ հիմա հերթով։

IMG 0207 - Յոթ նոտա, տասներկու հնչյուն, երեք մակարդակ ու անսահմանափակ հնարավորություններ

Մակարդակ I

Այս փուլում ուսանողները ստանում են ընդհանուր պատկերացում երաժշտական ժանրերի, գործիքների, երգաստեղծման սկզբունքներիի` երաժշտական շերտերի և այլ հասկացությունների մասին։ Պատանիները հմտանում են նոր գործիքի՝ Logic pro X ծրագրում (որում շարունակում են կատարելագործվել հետագա մակարդակներում), սովորում են մեղեդիներ և հարվածային ռիթմեր նվագել MIDI ստեղնաշարերով և մակարդակի վերջում ստեղծում են սեփական՝ մեկ րոպե տևող գործը։ «Ըստ իս` ամենակարևոր բանը, որ ուսանողը սովորում է դասընթացի առաջին փուլի ընթացքում, շփումն է, աշխարհայացքի ձևավորումը երաժշտության շնորհիվ և ուրիշ՝ ավելի երաժշտական ու մասնագիտական հայացքով ցանկացած երաժշտությանը դիտելը», ասում է դասընթացավար Խաչատուր Հայրապետյանը։

 

Մակարդակ II

«Ի՞նչ է ձայնը»։ Սա առաջին հարցն է, որ տրվում է դասընթացի այս մակարդակի մասնակիցներին։ Նրանք սովորում են աշխատել ձայնի հետ՝ «ֆիզիկական երևույթի, որը ալիքների մեխանիկական տատանումների տեսքով տարածվում է պինդ, հեղուկ կամ գազային միջավայրում»։ Ձայնային ձևավորումը կամ sound design-ը ֆիլմերում, վիդեոխաղերում և այլ ոլորտներում կարևորագույն դեր խաղացող հասկացություն է։ Թումոցիներն այս փուլում սովորում են ձայնի մշակման զանազան ձևերը, դրա հատկությունները, ձայնային էֆեկտները և, ի վերջո, ավարտում են ձայնային ձևավորման իրենց գործը՝ աշխատելով 2-ից 2,5 րոպե տևողությամբ անիմացիայի ձևավորման վրա։ Շահենը կիսվում է՝ «Սա իմ ամենասիրելի մասն է։ Ուսանողները հասկանում են, թե որքան կոմպլեքս, դժվար ու բազմակողմանի երևույթ է ձայնը, ու թե ինչպես կարելի է տարբեր բնական ձայներ օգտագործել ինչպես ձայնային դիզայնի, այնպես էլ հենց երաժշտության մեջ»։

Մակարդակ III

Ի մի բերելով 3 մակարդակների ընթացքում ստացած գիտելիքները՝ ուսանողը կարողանում է հասկանալ իր ուժեղ կողմերը և ստեղծել սեփական ցանկությամբ ընտրված մի նախագիծ։ Sampling-ի, mashup-ի, beatmaking-ի, dynamic processing-ի և այլ  երաժշտական տեխնիկաների շնորհիվ ուսանողը ստեղծում, ձայնագրում և մշակում է երաժշտություն, որը դառնում է իր «այցեքարտը» Թումոյի երաժշտական նախագծերից որևէ մեկին մասնակցելու համար։ «Երիտասարդ, ով տիրապետում է ծրագրին, կարողանում է երաժշտություն ստեղծել ու մի քանի նոր եղանակներ Է սովորել ձայների հետ աշխատելու համար։ Բայց ամենակարևորը՝ ուսանող, ում աշխարհայացքը ավելի երաժշտական է դարձել, ով սովորել է ինքնուրույն վերլուծել երաժշտությունը», այսպիսին է տեսնում երեք մակարդակները հաղթահարած ուսանողին Խաչատուրը։

 

«Մի աղջիկ ունեինք, ով կրկնեց 2րդ մակարդակն իր ցանկությամբ՝ ինձ խնդրելով, որ իրեն թողնեմ նույն մակարդակում, որպեսզի մի քանի բան ավելի լավ սովորի ու յուրացնի։ 3-րդ փուլից հետո նա հանձնեց խմբի լավագույն աշխատանքներից մեկը», հպարտությամբ ասում է Ծովինարը։ Բայց պատմությունն այդտեղ չի ավարտվում՝ նույն ուսանողը հետագայում հաջողում է մասնակցել Սեբու Սիմոնյանի աշխատարանին, իսկ ավելի ուշ դառնալ մեր Թմբաթա խմբի անդամ։ «Ուզում եմ առիթը բաց չթողնել ու ասել, որ աշխատասեր ու ներուժ ունեցող ուսանողները միշտ սպասված են աշխատարաններում և երաժշտական նախագծերում», ակնարկում է նման մի շարք ուսանողների Pyramidz խմբում ընդգրկած Շահենը։

Հետաքրքրե՞ց առաջարկում ենք սկսել ոգեշնչմամբ՝ լսելով թումոցիների գործերը մեր Soundcloud-ի էջում։

Music icon - Յոթ նոտա, տասներկու հնչյուն, երեք մակարդակ ու անսահմանափակ հնարավորություններ
Like
Like Love Haha Wow Sad Angry