3D մոդելավորման դասընթացավար Մարկ Հունանյանը պատմում է, որ 1990-ականներին, որպես կանոն, սովորական ֆիլմի մոտ 3-4%-ն էր 3D տարրեր պարունակում։ Այսօր այդ թիվը հասել է 90%-ի։

3d 1 - Մոդելավորելով ապագան եռաչափ ֆորմատով

Ֆիլմերի վիզուալ էֆեկտների և վիդեոխաղերի ստեղծման մեջ ակնհայտ կիրառումից բացի` 3D մոդելավորումը կարևոր դեր է խաղում գովազդում, ճարտարապետության, բժշկության, զարդերի ու արտադրական դիզայնի ոլորտներում։ Ըստ Մարկի` եռաչափ մոդելավորման  հնարավորություններն անսահման են, քանի որ «դրա միջոցով ամեն ինչ էլ կարելի է պատկերել, նույնիսկ հենց այս պահը, որում խոսում ենք, հնարավոր է թվայնացնել ու վերստեղծել 3D պատկերով»։ Եռաչափ մոդելավորման դասընթացի բոլոր մակարդակները լրացնելուց հետո թումոցին կարող է ստեղծել ցանկացած պատկեր՝ տեքստուրավորման, մոդելի կառուցվածքի ստեղծման` rigging-ի, ու վիզուալիզացման միջոցով։

Մակարդակ I

Ըստ դաընթացավար Գարիկ Խոդավիրդիի` շատ դասընթացներ սկսվում են դանդաղ տեմպով և մակարդակից մակարդակ արագություն հավաքում. 3D մոդելավորման դեպքում պատկերն այլ է։ «Մենք ուսանողներին օգնում ենք հասնել որոշակի կետի, որից հետո նրանք ազատ են լինել այնքան ստեղծագործ ու հավակնոտ, որքան ուզում են»։ Առաջին մակարդակում ուսանողների համար հիմնական դժվարությունը նոր գործիքներով աշխատելն է, սակայն 3D մոդելավորման հիմունքները յուրացնելուց հետո մնացածը սովորելը դառնում է ավելի հեշտ։ Կարելի է ասել, որ դա նման է հեծանիվ քշելուն։ Առաջին մակարդակում ուսանողները սովորում են համակարգչային անիմացիայի Maya ծրագրի մանրամասները և աշխատում են թվային գծագրման quader գործիքով, որպեսզի ստեղծեն 3D մինի մոտոցիկլետ։ Դասընթացավար Նաիրա Առաքելյանն ասում է, որ չնայած այս մակարդակը պահանջում է ընդամենը 20% ստեղծարարություն, կարծր մակերեսով մոդելի ստեղծումը անհրաժեշտ հիմք է բոլոր ուսանողների մոտ՝ անկախ նրանց տարիքից կամ նախնական փորձից։

 

Մակարդակ II

Երկրորդ մակարդակում ուսանողները մինի մոտոցիկլետի իրենց մոդելներին կենդանություն են տալիս՝ ներկելով մակերևույթները. այս պրոցեսը կոչվում է տեքստուրավորում։ Լավագույնն այն է, որ ուսանողներն ազատ են իրենց մոտոցիկլետները ձևավորել այնպես, ինչպես իրենք են ցանկանում։ Դասընթացավարները անմիջականորեն հետևում են գործընթացին և, եթե կարիք կա, խորհուրդ են տալիս օգտագործել տարբեր գունապնակներ ու տեքստուրաներ՝ ուսանողներին օգնելով հասնելու իրենց լավագույն արդյունքին։ Եվ նրանց խորհուրդներն ամբողջությամբ համապատասխանեցվում են ուսանողների հետաքրքրություններին։ Օրինակ՝ խաղերի եռաչափ մոդելավորումը պահանջում է հեշտ և արագ բեռնվող գրաֆիկա, մինչդեռ ֆիլմերի էֆեկտները կարող են ավելի մանրամասն և, հետևաբար, ավելի ծավալուն լինել։ «Ամեն ինչ միտված է ուսանողներին ուղղություն ցույց տալուն, որպեսզի նրանք կայացնեն սեփական լավագույն որոշումները», ասում է դասընթացվար Տիգրան Փարսադանյանը։ «Մեզ համար դժվար չէ պատասխանել հարցերին, սակայն ուսանողներն ավելին են ստանում, երբ ինքնուրույն են գտնում պատասխանները»։

 

Մակարդակ III

Ամեն ինչ է՛լ ավելի հետաքրքիր է դառնում այս փուլում, չէ՞ որ այստեղ պատանիները կարող են ստեղծել այն ամենը, ինչ կերևակայեն: Մինչ այս ուսանողներն արդեն մոդելավորել են կարծր մակերեսով իրեր և այժմ կարող են ստեղծել եռաչափ օրգանիկ կերպարներ: Հեշտ մեկնարկի համար ուսանողները նախ ստեղծում են եռաչափ պինգվին: «Պինգվինը արդյունքին հասնելու միջոց է», ասում է Գարիկը: «Նպատակը պինգվին ստեղծելը չէ, այլ դրա շնորհիվ յուրացնել  կառուցելու, շերտավորելու ու քանդակելու հմտությունները»: Առաջադրանքը կատարելու համար ուսանողներն օգտագործում են ZBrush թվային քանդակագործության ծրագիրը, որը թույլ է տալիս ստեղծել խիտ կերպարներ: Պինգվինից հետո ուսանողներն անցնում են իրենց նախընտրած կերպարի ստեղծմանը: Եռաչափ կերպարի շարժողական համակարգը հասկանալու համար ցանկալի է նաև ուսումնասիրել դրա կմախքի կառուցվածքն ու անատոմիան: Այս գործընթացը կոչվում է rigging, որը պարտադիր բաղադրիչ է խաղերի և ֆիլմերի ստեղծման մեջ:

Եռաչափ մոդելավորումը զարգացման բուռն փուլում է ու ներառում է բազմաթիվ ոլորտների մեծ շրջանակ: Դասընթացների բոլոր մակարդակները հաղթահարած ուսանողը կարող է հետագայում իր ուղին շարունակել առնչվող ցանկացած ոլորտում: Բայց, կրկին, սրանք եռաչափ մոդելավորման ընդամենը նախնական հմտություններն են: «Մի օր ինձ հարցրին, արդյոք մեր ուսանողներն ավելի հմուտ են 3D մոդելավորման ոլորտում, քան մենք: Պատասխանը ` իհարկե, ոչ։ Հաջողության բանաձևում տաղանդը մի փոքր մաս է կազմում։ Եթե ուսանողներն ուզում են շարունակել աշխատել այս ոլորտում, ապա պիտի անդադար աշխատեն իրենց վրա ու զարգացնեն տարբեր հմտություններ», ասում է դասընթացավար Նաիրան: Մի կարևոր խորհուրդ էլ Մարկն է ավելացնում. «Պարզապես պետք չէ վախենալ տարբեր բաների հետ աշխատել, սեղմել անծանոթ կոճակներ ու բացահատել դրանք: Սխալներ անելը ուսումնական ընթացքի մի մասն է»:

3D Modeling icon - Մոդելավորելով ապագան եռաչափ ֆորմատով
Like
Like Love Haha Wow Sad Angry
1