Արհեստական բանականությունը համալրում է Թումոյի կրթական ոլորտների ցանկը և ինտեգրվում բոլոր ոլորտներում
Թումոն թևակոխում է AI էրա։ Հոկտեմբերի մեկից Գեներատիվ AI-ը կդառնա Թումոյի 14 կրթական ոլորտներից մեկը: Ուսանողների կրթական ծրագրում կավելանան AI բաղադրիչներով ինքնուսուցման վարժանքներ, դասընթացներ և աշխատարաններ՝ միջազգային և տեղացի լավագույն մասնագետների ուղղորդմամբ: Արդյունքում թումոցիները ձեռք կբերեն գերժամանակակից հմտություններ, և կձևավորվի AI սուպերօգտատերերի սերունդ:
AI-ը Թումոյի նոր ոլորտ և բոլոր ոլորտներում
Թումոյի նոր կրթական ոլորտը` Գեներատիվ AI-ը, ինչպես և Թումոյի բոլոր ոլորտները, կներառի ինքնուսուցման վարժանքներ և մի քանի մակարդակ ունեցող գործնական, նախագծահեն դասընթացներ ու աշխատարաններ:
Առաջին մակարդակում ուսանողները կծանոթանան տարբեր AI մոդելներին և դրանց միջոցով կստեղծեն համակարգչային ծրագրեր, պատկերներ, տեսանյութեր, տեքստեր, ձայն և երաժշտություն։
Երկրորդ մակարդակում ուսանողներն արդեն կմարզեն և կկիրառեն AI մոդելներ, կծանոթանան AI համակարգերի տեխնիկական մանրամասներին: Նրանք նաև կուսումնասիրեն արհեստական բանականության հետ կապված անվտանգային ու էթիկական հարցերը՝ ապատեղեկատվություն, հաշվետվողականություն, վերահսկողություն և այլն։
Երրորդ մակարդակում ուսանողները հնարավորություն կստանան ինքնուրույն ստեղծելու AI համակարգեր, կառուցելու AI ագենտներ և մշակելու բազմաթիվ այլ տեխնոլոգիական նախագծեր։
Բացի այդ` Թումոյում մի քանի տասնյակով կավելանան տարվա ընթացքում անցկացվող AI-ի խորացված աշխատարանները։
Թումոյի բոլոր ոլորտներում AI-ը կդառնա պարտադիր բաղադրիչ՝ մշտապես թարմացվող ծրագրերով՝ ապահովելով խորը և համապարփակ AI գրագիտություն բոլոր ոլորտներում։
Ճանաչում և մրցանակներ
Կրթության ոլորտում արհեստական բանականության ինտեգրման ուղղությամբ կատարվող աշխատանքի համար անցյալ տարի Թումոն արժանացավ կրթական-տեխնոլոգիական կարևորագույն մրցանակաբաշխության՝ Tools Competition-ի գլխավոր մրցանակներից մեկին` ընտրվելով ավելի քան 1900 ընդունված հայտերից:
Կրթության ոլորտի Նոբելյան մրցանակը համարվող WISE Prize for Education-ի եզրափակիչ փուլ անցած 6 նախագծերից մեկը Թումոյի արհեստական բանականության կրթական նախագիծն է: Այն հավակնում է 1 միլիոն դոլար գլխավոր մրցանակին, որը կհայտարարվի նոյեմբերին:
Նախորդ տարի սեպտեմբերին ՅՈՒՆԵՍԿՈ-ի գլխամասում Թումոն ներկայացրեց արհեստական բանականության կրթական ծրագրերի մշակման իր Generative Learning մոտեցումը: Այս սեպտեմբերին ևս Թումոն հրավիրված է Փարիզ՝ ներկայացնելու իր մշակած GenAI կրթական ծրագիրը։
Թումոն ձևավորում է AI սուպերօգտատերերի սերունդ
Կրթական նորամուծությունը հասանելի կլինի բոլոր Թումո կենտրոններում և տուփերում` հնարավորություն տալով Հայաստանի պատանիներին ստանալու ապագային միտված կրթություն և դառնալու AI սուպերօգտատեր։
Մեր նպատակն է ուսանողներին տալ բոլոր անհրաժեշտ գործիքները, հմտությունները և ինքնավստահությունը, որպեսզի նրանք արհեստական բանականությունը ծառայեցնեն իրենց նպատակներին՝ խուսափելով պասիվ սպառող լինելու թակարդից և դառնան AI սուպերօգտատերեր, — նշում է Թումոյի զարգացման գծով տնօրեն Բեկոր Փափազյանը:
Միացե՛ք AI էրային
Թումոյի Գեներատիվ AI ոլորտի բոլոր ինքնուսուցման վարժանքները, դասընթացներն ու աշխատարանները հասանելի կլինեն նաև նոր գրանցվող պատանիներին, որոնք կարող են դառնալ ուսանող՝ գրանցվելով՝ register.tumo.org կայքում:
Եթե հետաքրքրված եք AI-ով, բաժանորդագրվե՛ք Թումոյի թարմացումներին AI ոլորտի մասնագետների հանրային դասընթացների, հանդիպումների ու միջոցառումների մասին տեղյակ լինելու համար՝ այցելելով genai.tumo.org։
