vahe and lucie 2021 - Վահե և Լյուսի մրցույթի 2021 արդյունքներ

Վահէ և Լյուսի մրցանակը տրվում է Թումոյի ուսանողներին ու շրջանավարտներին, որոնք ներկայացնել են իրենց աշխատանքներն արվեստի, տեխնոլոգիաների, երաժշտության, լուսանկարչության և ֆիլմի ոլորտներում։ Հայաստանի և Արցախի տարբեր քաղաքներից ուղարկված 438 դիմումներ դիտարկվել են՝ հիմնվելով դրանց ստեղծարարության, ներդրված ջանքերի և տեխնիկական մակարդակի վրա։ Թումոյի ուսանողներից, դասընթացավարներից և համապատասխան ոլորտի առաջատար մասնագետներից բաղկացած ժյուրիի հինգ խմբերը ընտրել են յուրաքանչյուր կատեգորիայի 1-ին, 2-րդ և 3-րդ տեղերը։

Յուրաքանչյուր անվանակարգում`

1-ին տեղ – 1,500,000 ՀՀ դրամ
2-րդ տեղ – 1,000,000 ՀՀ դրամ
3-րդ տեղ – 500,000 ՀՀ դրամ

*«Վահէ և Լյուսի» մրցանակաբաշխությունը հիմնադրվել է Վահէ և Լյուսի Ֆատտալների կողմից։

Վահէ և Լյուսի 2021 հաղթողներ

ԱՐՎԵՍՏ

1-ին տեղ
«Փարվանա» կոմիքս, Թումո Երևան

Սոֆիա Միրզոյան, 18

Հովհաննես Թումանյանի «Փարվանա» բալլադը Թումո Երևանի ուսանող Սոֆիայի շնորհիվ վերածվել է կոմիքսի: Նկարազարդումներն անելու և վերջնական արդյունքը ստանալու համար պահանջվել է 3 ամիս

2-րդ տեղ
«Հրեշի ութսունութ ստեղները», Թումո Երևան

Մարիա Ներսեսյան, 16

Այս ստեղծագործությունը պատմում է դաշնակահարուհու մասին, ով իր համերգի ճանապարհին ենթարկվում է ավտովթարի և կորցնում լսողությունը, սակայն տարիներ անց կարողանում է ուժ գտնել իր մեջ ու կրկին նվագել։

Հրեշի 88 ստեղները

ՄԱՍ ԱՌԱՋԻՆ

 

Քառակուսի հիշեցնող հյուրասենյակի չորս պատերից ամեն մեկն իր նպատակն ուներ։ Նեղ միջանցքից ներս մտած Էմմայի դիմաց գտնվող պատն իր մեջ էր պահում միակ հիշեցումը, որ տնից դուրս աշխարհ գոյություն ունի՝ լայն, երկու զույգ պատուհանները։ Նույն` Էմմայից աջ գտնվող պատին երկու ուղղանկյուններ ճանապարհ էին բացում դեպի իրարից լիովին տարբեր ննջասենյակներ։
Այն պատը, որին Էմման շուտով հենվելու էր, որ չընկնի՝ միջանցք տանող պատը, իր մեջ մեկ այլ դուռ ուներ, որ տանում էր դեպի խոհանոց։ Այդ դռնից, ինչպես միշտ, զանազան ուտեստների հոտ էր գալիս, որից Էմմայի քիմքն ինքնաբերաբար կայրվեր, եթե աչքերը հենց նոր չգրանցեին տարօրինակ երևույթը։ Չորրորդ՝ Էմմայից ձախ գտնվող պատը դատարկ չէր, ինչպես միշտ էր։ Դրան հենված իրը վաղուց մաքրվել էր Էմմայի հիշողությունից։ Աղջիկը լավ էր աշխատել, որ մոռանա այն, սակայն հինգ տարիների աշխատանքը փոշիացել էր երեք վայրկյանում։ Անշուք ու հասարակ այդ իրը երկար մնաց Էմմայի հայացքի ներքո, մինչև աղջիկը շարժվեց տեղից։
Միջանցքում իր վերարկուն բավական երկար կախող կնոջ՝ կարմիր շրթներկի տակ թաքնված ճաքճքած շուրթերը դողում էին անորոշությունից։ Ժպտա՞լ։ Չգիտեր։ Իրոք չգիտեր։ Միգուցե առա՞ջ գնալ։ Որոշեց քարանալ ու հեռվից դիտել երկար սպասված տեսարանը։ Էմման ևս մեկ քայլ արեց։ Երկու քայլ, ու վերջ՝ կհասներ հնացած մարմնին։ Ճերմակ ձեռքը դրեց կափարիչին։ Բարակ մատներով գտավ դաշնամուրի վերին շուրթն ու դանդաղորեն բացեց հրեշի բերանը։ Բերանը լիքն էր սև ու սպիտակ…

 

3-րդ տեղ
Ռեյկսմոնստրներ, Թումո Երևան

Գոհարիկ Դրոշակակիրյան, 23

Ռեյկսմոնստրները գրաֆիկական նկարազարդումներով խաղաքարտերի շարք է, որը նուրբ գրոտեսկով արտահայտում է Ամստերդամի Ռեյկսմյուզեում պետական թանգարանում ցուցադրված համաշխարհային 5 գլուխգործոցների կերպարների բնավորությունը: Խաղաքարտերը ստեղծվել են Վինսենթ վան Գոգի «Ինքնանկար», Կառլո Կրիվելիի «Մարիամ Մագդաղենացի», Յակոբ Կորնելիս վան Օոստսանենի «Դիմանկար», Ռեմբրանդ վան Ռեյնի «Կնոջ դիմանկար», Աբրահամ դե Վրիսի «Կնոջ դիմանկար» ու Անտոնիս Մոռի «Սըր Թոմաս Գրեշեմի դիմանկար» աշխատանքների հիման վրա:

ՖԻԼՄ

1-ին տեղ 
Վատ երազ, Թումո Ստեփանակերտ

Առնոլդ Ղազարյան, 20

Կարճամետրաժ ֆիլմը հայ մարդու տոկունության և ցավը ուժի վերածելու կարողության մասին է:

2-րդ տեղ
«Աստվածային կատակերգություն», Թումո Երևան

Ալեքսանդեր Չոբանյան, 18
Ամատունի Մարգարյան, 19
Ալվարդ Գևորգյան, 19
Անրի Չիլինգարյան, 17

Արփի Բաբայան, 16
Էլինա Երկանյան, 19
Էլեն Խաչատրյան, 16
Գոհար Սարգսյան, 17
Լարիսա Մուսայելյան, 20

Մանե Մարկոսյան, 17
Մարի Գրիգորյան, 18
Սալիմ Դանիելյան, 19
Սոֆիա Միրզոյան, 18

Դանթեի մահվան 700-ամյակին նվիրված աշխատարանում թումոցիները Շամիրամ Խաչատրյանի հետ անիմացրել են գրողի մագնում օպուսի` Աստվածային կատակերգություն պոեմի բոլոր երեք մասերը` Դժոխքը, Քավարանն ու Դրախտը:

3-րդ տեղ
Անկախության օրը Լոռիում, Թումո Երևան

Անի Ղուլինյան, 20

Այս ֆիլմը Լոռվա սարերից մեկում ապրող տարեց զույգի մասին է, որի հետ ֆիլմի հեղինակն անցկացրել է ՀՀ 30-րդ անկախության օրը։ Մայրաքաղաքում և դրանից 150 կմ հեռավորության վրա գտնվող սարում մարդիկ տարբեր կերպ են ընկալում անկախությունը և տարբեր կերպ էլ նշում են` մեծ տոնակատարություններով կամ առօրյայի ընթացքում ուղղակի մի պահ դրա մասին հիշելով։

ԵՐԱԺՇՏՈՒԹՅՈՒՆ

1-ին տեղ
Կարոտ, Թումո Երևան

Տաթև Մայիլյան, 15

Թումո բենդի անդամ Տաթևի հեղինակած այս երգը կյանքի փորձությունների, դժվարությունների ու մարդու մասին է, այս երգում յուրաքանչյուրը կգտնի իր պատմությունը:

2-րդ տեղ
Melodic Neuro/DnB, Թումո Երևան

Հովհաննես Վարդանյան, 17

Այս գործը Drum և Bass (DnB) ու Melodic Neuro ժանրերի խառնուրդ է:

3-րդ տեղ
Բաս կիթառ, Թումո Երևան

Հակոբ Խեչոյան, 15

Թումոյի երաժշտության դասընթացի մասնակից Հակոբն իր բաս կիթառով «միացել է» Իսրայել Հյութոնին և Նյու Բրիդիին` նվագելու «Your Name is Great» գոսպել երգը։

ԼՈՒՍԱՆԿԱՐՉՈՒԹՅՈՒՆ

1-ին տեղ
Բերքահավաք, Թումո Երևան

Վահե Վարդանյան, 20

Հայաստանի գյուղերից մեկում արված այս ֆոտոպատմությունը խաղողի բերքահավաքի մասին է։ Այն պատմում է խաղողի բերքահավաքի մասին, որի ընթացքում առանձնացվում է սև և սպիտակ խաղողը, մեկից ստանում են տնական, ավանդական գինի, իսկ մյուսը օգտագործվում է վաճառքի համար։

2-րդ տեղ
Տատիկի տունը, Թումո Երևան

Միլենա Ավետիսյան, 17

Տատիկի տունը հիշեցնող իրերի, գողտրիկ դետալների մասին այս ֆոտոշարքը մտովի տեղափոխում է մանկություն: Լուսանկարներն արվել են Samsung A10 հեռախոսով

3-րդ տեղ (2 հաղթող)
Պապիկիս հեռուստացույցների հավաքածուն, Թումո Գյումրի

Ռիտա Յայլոյան, 18

Այս շարքը Ռիտայի պապիկի անփոփոխ սիրո` հեռուստացույցների մասին է, որը ներկայացնում է դրանց զարգացման մի ամբողջ դարաշրջան` լամպայինից մինչև խելացի:

3-րդ տեղ (2 հաղթող)
Պապիկիս արհեստանոցում, Թումո Երևան

Միլենա Մովսեսյան, 16

Ֆոտոպատմությունը Միլենայի պապիկի առօրյայի մասին է, ով իր ժամանակն անցկացնում է արհեստանոցում, իսկ ազատ ժամանակ շատ է սիրում զրուցել ընկերների հետ:

ՏԵԽՆՈԼՈԳԻԱՆԵՐ

1-ին տեղ
Լազերային փորագրություն, Թումո Երևան

Պարգև Մալխասյան, 16

Այս սարքը համակարգչից ստացած պատկերները փորագրում է ցանկացած նյութի վրա` լինի դա փայտ, պլաստմաս, թե ստվարաթուղթ:

2-րդ տեղ
Project H, Թումո Երևան

Դավիթ Կիրակոսյան, 22

Project H-ն առցանց մուլտի խաղացող կիբերփանկ ռազմավարական թղթախաղ է` տարբեր կերպարներով և հնարավորություններով:

3-րդ տեղ (2 հաղթող)
Երաժշտական թերապիա արհեստական բանականության հետ, Թումո Երևան

Նազելի Տեր-Պետրոսյան, 17

Օգտագործելով ml5.js գրադարանը` Նազելին մշակել է ծրագիր, որը KNN Classifier-ի միջոցով հասկանում է օգտագործողի դեմքի արտահայտությունը և միացնում նրա տրամադրությանը համապատասխան երաժշտություն։

3-րդ տեղ (2 հաղթող)
Hands, Թումո Երևան

Անդրանիկ Փամբուխչյան, 17

Hands ծրագիրը հնարավորություն է տալիս ձեռքերի և վեբ տեսախցիկի օգնությամբ հեռավոր կարգով կառավարել համակարգիչը:

Ժյուրիի անդամներ

Արվեստ

Վիգեն Գալստյան – համադրող, արվեստաբան
Միքայել Մարտիրոսյան – արտիստ, Թումոյի դասընթացավար
Աննա Դավթյան – գրող, Թումոյի դասընթացավար
Մարիամ Նազարյան – Թումոյի շրջանավարտ

arts award gif - Վահե և Լյուսի մրցույթի 2021 արդյունքներ

Երաժշտություն

Միշ Ամիրյան – ջազ երաժիշտ
Դավիթ Դավթյան – երաժիշտ, Թումոյի դասընթացավար
Քրիստինա Եղիազարյան – Թմբաթա խմբի անդամ,
Թումոյի ուսանող

music award - Վահե և Լյուսի մրցույթի 2021 արդյունքներ

Ֆիլմ

Ռուզան Բագրատունյան – կինոլրագրող, «Կինոաշխարհ»
ամսագրի խմբագիր
Լուսինե Պապոյան – ռեժիսոր, Թումոյի դասընթացավար
Մերի Դանիելյան – Թումոյի ուսանող

film award - Վահե և Լյուսի մրցույթի 2021 արդյունքներ

Տեխնոլոգիաներ

Խաչատուր Վիրաբյան – ծրագրավորող
Սուրեն Մադոյան – ծրագրավորող, Թումոյի
դասընթացավար
Տիգրան Սերոբյան – Թումոյի ուսանող

tech award - Վահե և Լյուսի մրցույթի 2021 արդյունքներ

Լուսանկարչություն

Մելիք Բաղդասարյան – Photolure լրատվական գործակալության հիմնադիր, ֆոտոլրագրող
Հակոբ Մարգարյան – Թումոյի լուսանկարչության և ֆիլմարտադրության մասնագետ
Հակոբ Բալաբյան – Թումոյի շրջանավարտ

photo award - Վահե և Լյուսի մրցույթի 2021 արդյունքներ

Վահէ և Լյուսի Ֆատտալ

Վահէ և Լյուսի մրցանակը նվիրված է Վահէ Ֆատտալի և նրա կնոջ` Լյուսիի հիշատակին: Իր կյանքի վերջին տարիներին Վահէն հիմնեց այս մրցանակը` ի հիշատակ իր կնոջ: Այժմ մենք այն նվիրում ենք նրանց հիշատակին և թումոցիների անունից շնորհակալություն ենք հայտնում այս կարևոր աջակցության համար:

Նկարիչ և գրաֆիկական դիզայներ Վահէ Ֆատտալը ուսումնասիրել է գեղանկարչություն Փարիզի գեղարվեստի ազգային դպրոցում: Լոս Անջելեսի մի շարք մեծ կազմակերպություններում որպես արտ-տնօրեն աշխատելուց հետո, հիմնել է դիզայնի և գովազդի սեփական գրասենյակը:

Գրասենյակի գործընկերների շարքը ներառում է այնպիսի կազմակերպություններ, ինչպիսիք են ABC հեռուստաընկերությունը (ABC-ի բացառիկ գովազդային գործընկերն է եղել 18 տարի), Հոլիվուդյան կինոարտադրության «մեծ հնգյակը» (Paramount Studios, Columbia Pictures/Sony Pictures Studio, 20th Century Fox, Universal Studios, Warner Bros Studio), Nissan-ը, UCLA Extension-ը և այլք:

Գրասենյակն իրականացնում է կորպորատիվ ինքնության և հաղորդակցության, գովազդային և մարկետինգային արշավների, ֆիլմերի և հեռուստատեսական արշավների, շարժական գրաֆիկայի և բրենդավորման բոլոր ծառայությունները:

Միևնույն ժամանակ Վահէն ստեղծագործականորեն ներգրավված էր Հայաստանի գործընթացների և նախագծերի առաջխաղացման ծրագրերում. նախագծել է Արցախի խորհրդանիշն ու պաստառները (1988), արցախյան դրոշի դիզայնը (1988), «Ոսկե ծիրան» միջազգային կինոփառատոնի վիզուալ տարբերանշանի դիզայնը (2004)։ Ֆատտալը հանդիսացել է Հայաստան համահայկական հիմնադրամի գլխավոր համահիմնադիրներից մեկը և «make it happen» արշավի դիզայնի հեղինակն է (2004), եղել է Armenian International Magazine-ի արտ-տնօրեն (1990-1992):

Լյուսին եղել է Կալիֆոռնիայի համալսարանի շրջանավարտ, ունեցել է փիլիսոփայության և ֆրանսիական գրականության մագիստրոսական աստիճան: Այնուհետև Փարիզի Սորբոնի համալսարանում ավարտել է ֆրանսերենի և քաղաքակրթական գիտությունների դասընթացներ:

Վահէն և Լյուսին հանդիպել, ամուսնացել և ապրել են Փարիզում:

Հետագայում նրանք տեղափոխվել են Լոս Անջելես, որտեղ Լյուսին որոշ տարիներ ֆրանսերեն դասավանդելուց հետո հիմնել է իր տուրիստական գործակալությունը Բևերլի Հիլզում, որը տրամադրում էր միջազգային VIP ուղևորություններ և բնակության ծառայություններ արվեստի (ցուցասրահներին, արտիստներին, աճուրդի տներին, արվեստի խորհրդատուներին), ժամանցի ոլորտի (կինոարտադրողների, դերասանների, ռեժիսորների, պրոդյուսերների) ներկայացուցիչների, ինչպես նաև կորպորատիվ կազմակերպությունների:

Վահէն ու Լյուսին կիսում էին նվիրվածությունն ու սերը Հայաստանի, կրթության, արվեստի և աշխարհի բացահայտման հանդեպ: